വീണ്ടും മോളിവുഡിലേക്ക്‌
പ്രിയദര്‍ശന്റെ അങ്കിള്‍ ബണ്‍ എന്ന ചിത്രത്തിലൂടെ ബലാതാരമായി മോളിവുഡില്‍ എത്തിയ രേഖ മാരുതി രാജിന്‌ പേരുകള്‍ എണ്ണിയാല്‍ തീരില്ല. പേരുകള്‍ അടിക്കടി മാറ്റിയിട്ടും ഈ നടിയുടെ ജാതകം തെളിഞ്ഞില്ല.
എം.ടി.യുടെ തീര്‍ഥാടനം എന്ന സിനിമയില്‍ അശ്വതിയായി വീണ്ടും നായികാവേഷത്തില്‍ എത്തിയ ശാലീനസുന്ദരി ഫാന്റം പൈലി, കണ്ണിനും കണ്ണാടിക്കും എന്നീ ചിത്രങ്ങളിലും അശ്വതി എന്ന പേരിലാണ്‌ അഭിനയിച്ചത്‌. മോളിവുഡില്‍ ശോഭിക്കാന്‍ കഴിയാതിരുന്ന അശ്വതി പിന്നീട്‌ കോളിവുഡിലേക്ക്‌ വഴിമാറി. അഴകി എന്ന ചിത്രത്തില്‍ മോനിഷ എന്ന്‌ പേരുമാറ്റി പരീക്ഷണം നടത്തി. എന്നാല്‍ പിന്നീട്‌ ആ പേരും മാറ്റി. മോണിക്ക എന്ന പേരില്‍ കാതല്‍ അഴവതില്ലൈ ഉള്‍പ്പെടെ നിരവധി ചിത്രങ്ങളില്‍ ഏറെ ഗ്ലാമറായി അഭിനയിച്ചു. ഇപ്പോള്‍ ഇതാ പാര്‍വണ എന്ന പേരില്‍ വീണ്ടും മോളിവുഡില്‍ പരീക്ഷണത്തിനായി വന്നിരിക്കുന്നു.
സുഹൃത്ത്‌ ബന്ധങ്ങളുടെ കഥപറഞ്ഞ കഥ പറയുമ്പോള്‍, ഗുരു-ശിഷ്യ ബന്ധത്തിന്റെ തീക്ഷണമായ കഥയായ മാണിക്യക്കല്ല്‌ എന്നീ ചിത്രങ്ങള്‍ക്ക്‌ ശേഷം എം. മോഹനന്‍ സംവിധാനം ചെയ്യുന്ന പുതിയ ചിത്രത്തിലാണ്‌ പാര്‍വണയായി അശ്വതി തിരിച്ചുവരുന്നത്‌. നയന്‍ വണ്‍ സിക്‌സ്‌ എന്ന്‌ പേരിട്ടിരിക്കുന്ന ചിത്രത്തിലൂടെയുള്ള തിരിച്ചു വരവ്‌ ഏറെ പ്രതീക്ഷയോടെയാണ്‌ പാര്‍വണ കാണുന്നത്‌.
പത്മപ്രിയ, ലക്ഷ്‌മിറായ്‌, യാമി ഗൗതം, മേഘനാരാജ്‌, വിമലാ രാമന്‍ എന്നിവര്‍ മോളിവുഡില്‍ എത്തി ഗ്ലാമര്‍ കാണിച്ച്‌ യുവാക്കളെ കോരിത്തരിപ്പിച്ചവരാണ്‌. ഇവര്‍ക്കുതൊട്ടുപിന്നാലെയാണ്‌ അശ്വതി പാര്‍വണയായി എത്തുന്നത്‌.
